NILINAW ng Malacañang na magkaiba ang nature ng impeachment case at criminal case kaya maaaring sampahan ng criminal complaint si Vice President Sara Duterte habang nagpapatuloy ang impeachment trial laban sa kanya.
Ayon kay Presidential Communications Office (PCO) Undersecretary at Palace Press Officer Claire Castro, walang legal na hadlang sa paghahain ng criminal case laban sa isang impeachable official habang dinidinig ang impeachment case nito.
“Magkaiba po kasi ang criminal case, magkaiba din po ang impeachment. Iba po ang nature ng dalawa,” binigyang-diin ni Castro.
Ang paglilinaw ay kasunod ng kumpirmasyon ng Department of Justice (DOJ) na naghain ito ng reklamong grave threats laban kay VP Sara.
Ayon kay DOJ spokesperson Polo Martinez, inihain ang reklamo sa Office of the Clerk of Court ng Quezon City Regional Trial Court alas-1:30 ng hapon nitong Martes, Agosto 11.
Kaugnay ito ng umano’y pahayag ng bise presidente na nagkontrata siya ng isang assassin upang ipapatay sina President Ferdinand “Bongbong” Marcos Jr., First Lady Liza Marcos at dating House Speaker Martin Romualdez sakaling siya ay mapatay.
Samantala, sinabi ni Atty. Paul Lawrence Lim, abogado ni VP Sara, na gagamitin ng kanyang kliyente ang lahat ng available legal remedies.
“The Vice President may not be prosecuted for an alleged offense that is also the subject of an impeachment case… The Vice President will exercise all available legal remedies in due course,” pahayag ni Lim.
Sinabi naman ni Castro na sa kanyang pananaw ay hindi sapat ang isinampang grave threats complaint laban kay VP Sara.
“Actually kulang pa nga ‘yan. Ako, ha, as an ordinary citizen, as a lawyer, feeling ko kulang pa nga ‘yung kaso na ‘yan,” ani Castro.
“Hindi lang ‘yan grave threats, kasi sowing hatred talaga. The whole video. Sowing hatred against the President, against the First Lady,” dagdag niya.
Binigyang-diin din ni Castro na walang immunity from suit si VP Sara.
“Wala siyang immunity from suit, so pwede siyang sampahan ng kaso. So, dapat noon pa nga,” aniya.
Itinanggi rin ni Castro na dapat sisihin si President Ferdinand Marcos Jr. sa paghahain ng reklamo laban sa bise presidente.
“Kasi ginawa niya ‘yan. Totoo namang nakita natin,” pahayag ni Castro.
(CHRISTIAN DALE)
60 
